15:55 09-04-2026

CUPRA Ravalın istehsal modeli rəsmən təqdim edildi

CUPRA nəhayət ki, şəhər tipli elektrikli avtomobil olan Ravalın istehsal modelini rəsmən təqdim etdi. Bu, markanın şəhər içi hatchback segmentinə ilk addımıdır. 2021-ci ildə təqdim olunan Urban Rebel konseptindən inkişaf etdirilən yeni model, idman xarakterli dizaynı və 4 metrdən bir qədər artıq uzunluğu ilə diqqət çəkir.

Ravalın uzunluğu 4046 mm, oxlararası məsafəsi isə 2600 mm-dir. Baqajın həcmi 430 litrdir. Salonunda sürücülər 10,25 düymlük rəqəmsal cihazlar paneli və 12,9 düymlük multimedia ekranı ilə qarşılaşacaq. Avtomobil, avtomatik parketmə, 360 dərəcə kameralar və toqquşmadan sonra məlumatları təhlil edən təhlükəsizlik funksiyaları daxil olmaqla, geniş sürücü köməkçi sistemlər kompleksi ilə təchiz olunub.

Ön təkərdən çəkən MEB Plus platformasında qurulan Raval, 116-dan 226 at gücünə qədər güc göstəriciləri olan dörd versiyada təqdim olunacaq. Əsas modellər 37 kWh tutumlu LFP batareya ilə təchiz olunub və təxminən 300 km məsafə qət etmə imkanı verir. Daha yüksək səviyyəli versiyalar isə 52 kWh tutumlu batareya ilə gəlir və maksimum avtonomiyanı 450 km-ə qədər artırır. Ən güclü VZ variantı 0-dan 100 km/s-ə 7 saniyədə çıxa bilir və maksimum sürəti 175 km/s təşkil edir. Sürətli yükləmə batareyanı 10%-dən 80%-ə cəmi 23 dəqiqə ərzində doldurmağa imkan verir.

CUPRA Ravalın satışına 2026-cı ilin yayında başlanılması planlaşdırılır. Əsas qiymətin təxminən 26.000 avrodan başlaması gözlənilir, lakin yekun qiymət buraxılışa yaxın təsdiqlənəcək.