18:59 25-04-2026

Denza yenilənmiş N8L və flaqman SUV N9-u təqdim edir

Pekində keçirilən beynəlxalq avtosalonda BYD-nin premium subbrendi Denza yenilənmiş N8L krossoverini və flaqman N9 modelini təqdim etdi. Hər iki avtomobil Çin bazarına yönəlib və müasir dizayn, innovativ texnologiyalar, eləcə də genişləndirilmiş elektron köməkçi sistemləri ilə seçilir.

Yenilənmiş flaqman krossover Denza N9 5258 mm uzunluğa, 2030 mm enə və 1830 mm hündürlüyə malikdir, təkər bazası isə 3125 mm-dir. Ölçülərinə görə yeni Denza onun əsas rəqibi sayılan Li L9-u belə üstələyir. Denza flaqmanı 2+2+2 sxemli altıyerlik salonla təqdim olunur. Baqaj həcmi 351 litrdir, ikinci və üçüncü sıra oturacaqların söykənəcəkləri qatlandıqda isə bu göstərici 1140 litrə çatır.

N9 standart pnevmatik asqılı tam ötürücülü hibrid kimi debüt etdi; modelin avadanlıqları sırasında “yengəc” rejimi də var. Hibrid qurğu generator kimi işləyən 207 a.g. gücündə 2.0 litrlik turbo benzin mühərriki, üç elektromotor — biri öndə, ikisi arxada — və 46,9 kVt-saatlıq batareyadan ibarətdir. Ümumi hasilat 925 a.g. və 1035 Nm-dir. Denza N9-un 0-dan 100 km/saatadək 3,9 saniyəyə sürətləndiyi bildirilir. Yalnız elektriklə avtomobil Çin CLTC dövrünə görə 202 km gedir, ümumi yürüş məsafəsi isə 1302 km-dir.

Pekində daha kiçik model — N8L krossoveri də nümayiş etdirildi. Xarici görünüşcə “səkkizlik” daha böyük Denza N9-u xatırladır, lakin N8L yenə də öz dizaynına malikdir. Krossoverdə şaquli far blokları var, gündüz işıqları isə ikiqat üfüqi zolaqlar şəklində hazırlanıb. N8L fərqli kuzov əlavələri ilə də seçilir, arxa qeydiyyat nişanı isə bamperdə yerləşdirilib. Denza N8L daha kompaktdır: uzunluğu 5200 mm, eni 1999 mm, hündürlüyü 1820 mm, təkər bazası isə 3075 mm-dir. Kiçik krossoverə 20 və ya 21 düymlük təkərlər verilir, “doqquzluq” isə 22 düymlük disklərlə təchiz olunur.

Denza N9 kimi, Denza N8L də pnevmatik asqılı tam ötürücülü plug-in hibriddir. Daha kiçik SUV-un güc qurğusuna generator kimi işləyən 207 a.g.-lik 2.0 litrlik turbo benzin mühərriki və üç elektromotor — biri öndə, ikisi arxada — daxildir. Ümumi güc 761 a.g.-dir. “Səkkizlik” 46,99 kVt-saatlıq batareya ilə təchiz olunub. Yalnız elektriklə Denza N8L CLTC dövrünə görə 230 km gedir, ümumi məsafə isə 1300 km-dir. Krossover yerindən 100 km/saata 3,9 saniyəyə sürətlənir.