13:56 25-04-2026

Porsche-ը վաճառում է Bugatti Rimac-ի իր բաժնեմասը

Porsche-ը հայտարարել է Bugatti Rimac համատեղ ձեռնարկությունում իր 45% բաժնեմասի վաճառքի մասին ամերիկյան HOF Capital հիմնադրամի գլխավորած ներդրումային կոնսորցիումին։ Գործարքը տեղի է ունենում գերմանական ավտոարտադրողի շահույթի կտրուկ անկման և ռազմավարության վերանայման ֆոնին։

Bugatti Rimac-ը ստեղծվել է 2021 թվականին՝ Bugatti-ի հիպերքարային տեխնոլոգիաները Rimac-ի էլեկտրական լուծումների հետ միավորելու համար։ Այժմ Porsche-ը ամբողջությամբ դուրս է գալիս նախագծից՝ իր բաժնեմասը փոխանցելով եգիպտացի միլիարդատեր Sawiris-ի ընտանիքի հետ կապված ներդրումային կոնսորցիումին։ Գործարքի ավարտից հետո Rimac Group-ը կստանա Bugatti Rimac-ի լիակատար վերահսկողությունը և կշարունակի բրենդի զարգացումը առանց Porsche-ի մասնակցության։

Որոշումը կապված է ընկերության վրա աճող ֆինանսական ճնշման հետ։ Porsche-ի գործառնական շահույթը նախորդ տարի նվազել է 93%-ով, իսկ մարժան՝ մեկ տարի առաջվա 14,1%-ից իջել մինչև 1,1%։ Չինաստանում պահանջարկի նվազման և ԱՄՆ-ում սակագների ճնշման պայմաններում ընկերության նոր CEO-ն շեշտը դնում է ծախսերի կրճատման և կապիտալի ազատման վրա։ Bugatti Rimac-ի բաժնեմասի վաճառքը այս ռազմավարության մի մասն է։

Porsche-ի դուրս գալը նախագծից փոխում է ուժերի հարաբերակցությունը հիպերքարերի և էլեկտրական մեքենաների հատվածում։ Rimac-ը ավելի մեծ ազատություն է ստանում իր տեխնոլոգիաներն ու Bugatti բրենդը զարգացնելու համար, մինչդեռ Porsche-ը կենտրոնանում է հիմնական մոդելների և շահութաբերության վերականգնման վրա։ Bugatti Rimac-ի գնահատականը գերազանցում է 1 միլիարդ դոլարը, ինչը ընդգծում է ներդրողների հետաքրքրությունը բարձր տեխնոլոգիական սուպերքարերի նիշայի նկատմամբ։