04:25 10-05-2026
რას ჩაეჭიდოს მგზავრი? GM-ს სახელური თავსაყრდენში სურს დამალოს
GM-მა შეიტანა პატენტი ჩაშენებული სახელურის მქონე სავარძელზე, რომელიც პირდაპირ თავსაყრდენშიც შეიძლება ჩამონტაჟდეს.
General Motors-მა შეიტანა პატენტი თავსაყრდენზე, რომელიც მგზავრისთვის სახელურის ფუნქციასაც შეასრულებს. განცხადება US 12,617,326 B2 ნომრით აშშ-ის პატენტებისა და სავაჭრო ნიშნების უწყებაში ჯერ კიდევ 2023 წლის 25 მაისს იყო შეტანილი, ხოლო გამოქვეყნდა 2026 წლის 5 მაისს.
იდეა მარტივია: მგზავრისთვის ბოძზე ან კარის თავზე დამონტაჟებული სტანდარტული სახელურით სარგებლობა ყოველთვის მოსახერხებელი არ არის. ასეთ დროს ხშირად სავარძლის ზურგზე ან თავსაყრდენზე ეჭიდებიან, რათა მანქანაში ჩასხდნენ ან გადმოვიდნენ. მაგრამ ეს ნაწილები პოლნოცენური სახელურის მსგავსად მუდმივ დატვირთვაზე გათვლილი არ არის და დროთა განმავლობაში სიმტკიცის ან გადასაკრავის პრობლემები შეიძლება გამოვლინდეს.
GM-ის პატენტში აღწერილია სავარძელი, რომელსაც ერთ ან ორივე გვერდით ზედაპირზე ჩაღრმავება აქვს. ამ ჩაღრმავებაში ჩამონტაჟებულია სახელური, რომელზეც მგზავრი ხელის ჩავლებას შეძლებს. ერთ-ერთი ვარიანტი ითვალისწინებს ასეთი სახელურის პირდაპირ თავსაყრდენში დამონტაჟებას. საჭიროების შემთხვევაში სახელური ორიც შეიძლება იყოს — თითო თითოეულ მხარეს.
კონსტრუქციის მნიშვნელოვანი ნაწილია შიდა დატვირთვის გადამცემი ელემენტი. პატენტის აღწერით, სამაგრი დეტალები შეიძლება სავარძლის ზურგში ჩავიდეს და დატვირთვა კარკასის უფრო მტკიცე ნაწილებს გადასცეს. ეს იმისთვის არის საჭირო, რომ სახელურმა მგზავრის გამწევი ძალა გაუძლოს და მთელი დატვირთვა მხოლოდ რბილ გადასაკრავსა თუ თავსაყრდენის გარე გარსზე არ მოვიდეს.
სახელურის ზოგი ვერსია სტაციონარული იქნება, ზოგი კი ჩასაკეცი: ჩაკეცილ მდგომარეობაში სახელური ჩაღრმავებაში იმალება, ხოლო საჭიროებისას გარეთ გამოდის. ჯერჯერობით ეს მხოლოდ პატენტია, სერიული ოფცია არ არის. GM არ აზუსტებს, რომელ მოდელებში შეიძლება გამოჩნდეს ასეთი თავსაყრდენი და ზოგადად გადავა თუ არა ეს მიმართულება წარმოებაში.