13:56 25-04-2026

Porsche Bugatti Rimac’dagi ulushini sotadi

Porsche Bugatti Rimac qo‘shma korxonasidagi 45% ulushini AQShning HOF Capital fondi boshchiligidagi investorlar konsorsiumiga sotishini e’lon qildi. Bitim nemis avtomobil ishlab chiqaruvchisining foydasi keskin pasaygan va strategiyasi qayta ko‘rib chiqilayotgan bir paytda amalga oshirilmoqda.

Bugatti Rimac 2021 yilda Bugatti’ning giperkarlarga oid texnologiyalarini Rimac’ning elektr yechimlari bilan birlashtirish uchun tashkil etilgan. Endi Porsche loyihadan to‘liq chiqib ketmoqda va o‘z ulushini misrlik milliarder Sawiris oilasi bilan bog‘liq investitsiya konsorsiumiga o‘tkazmoqda. Tranzaksiya yakunlangach, Rimac Group Bugatti Rimac ustidan to‘liq nazoratga ega bo‘ladi va brendni Porsche ishtirokisiz rivojlantirishda davom etadi.

Bu qaror kompaniyaga bo‘lgan moliyaviy bosim bilan bog‘liq. Porsche’ning operatsion foydasi o‘tgan yili 93% ga pasaydi, marja esa bir yil avvalgi 14,1% dan 1,1% gacha tushdi. Xitoyda talabning kamayishi va AQSh tariflari bosimi fonida kompaniyaning yangi CEO’si xarajatlarni qisqartirish va kapitalni bo‘shatishga e’tibor qaratmoqda. Bugatti Rimac’dagi ulushning sotilishi shu strategiyaning bir qismidir.

Porsche’ning loyihadan chiqishi giperkarlari va elektromobillar segmentidagi kuchlar muvozanatini o‘zgartiradi. Rimac o‘z texnologiyalari va Bugatti brendini rivojlantirishda ko‘proq erkinlikka ega bo‘ladi, Porsche esa asosiy modellari va rentabellikni tiklashga e’tibor qaratadi. Bugatti Rimac qiymati 1 milliard dollardan oshadi, bu investorlarning yuqori texnologiyali superkarlar yo‘nalishiga qiziqishini ko‘rsatadi.