18:59 25-04-2026

Denza yangilangan N8L va flagman SUV N9’ni taqdim qildi

Pekindagi xalqaro avtosalonda BYDning premium subbrendi Denza yangilangan N8L krossoveri va flagman N9 modelini taqdim etdi. Ikkala avtomobil ham Xitoy bozoriga yo‘naltirilgan bo‘lib, zamonaviy dizayn, innovatsion texnologiyalar va kengaytirilgan elektron yordamchi tizimlari bilan ajralib turadi.

Yangilangan flagman krossover Denza N9 uzunligi 5258 mm, eni 2030 mm va balandligi 1830 mm, g‘ildirak bazasi esa 3125 mm. O‘lchamlari bo‘yicha yangi Denza uning asosiy raqibi hisoblanadigan Li L9’dan ham kattaroq. Denza flagmani 2+2+2 tartibidagi olti o‘rinli salon bilan taqdim etiladi. Yukxona hajmi 351 litr, ikkinchi va uchinchi qator suyanchiqlari buklanganda esa 1140 litrgacha oshadi.

N9 standart pnevmatik osma bilan jihozlangan to‘liq uzatmali gibrid sifatida debyut qildi; model jihozlari orasida “qisqichbaqa” rejimi ham bor. Gibrid tizimga generator sifatida ishlovchi 207 ot kuchiga ega 2.0 litrli turbo benzinli to‘rt silindrli dvigatel, uchta elektromotor — biri oldda va ikkitasi orqada — hamda 46,9 kVt-soat sig‘imli batareya kiradi. Umumiy quvvat 925 ot kuchi va 1035 Nm. Denza N9 0 dan 100 km/soatgacha 3,9 soniyada tezlashishi aytilmoqda. Faqat elektrda avtomobil Xitoy CLTC sikli bo‘yicha 202 km yuradi, umumiy yurish zaxirasi esa 1302 km.

Pekinda kichikroq model — N8L krossoveri ham namoyish etildi. Tashqi ko‘rinishda “sakkizlik” kattaroq Denza N9’ni eslatadi, biroq N8L o‘z dizayniga ega. Krossover vertikal far bloklariga ega, kunduzgi chiroqlar esa ikki gorizontal plastina ko‘rinishida ishlangan. N8L boshqa kuzov bezaklariga ham ega, orqa davlat raqami esa bamperda joylashgan. Denza N8L ixchamroq: uzunligi 5200 mm, eni 1999 mm, balandligi 1820 mm, g‘ildirak bazasi 3075 mm. Kichik krossover 20 yoki 21 dyuymli g‘ildiraklar bilan jihozlanadi, “to‘qqizlik”da esa 22 dyuymli disklar bor.

Denza N9 kabi, Denza N8L ham pnevmatik osmaga ega to‘liq uzatmali plug-in gibriddir. Kichik SUV’ning tizimiga generator sifatida ishlovchi 207 ot kuchili 2.0 litrli turbo benzinli dvigatel va uchta elektromotor — biri oldda, ikkitasi orqada — kiradi. Umumiy quvvat 761 ot kuchi. “Sakkizlik” 46,99 kVt-soatli batareya bilan jihozlangan. Faqat elektrda Denza N8L CLTC sikli bo‘yicha 230 km yuradi, umumiy yurish zaxirasi esa 1300 km. Krossover joyidan 100 km/soatgacha 3,9 soniyada tezlashadi.