Tesla orqa ko‘rinish kamerasi kechikishi sabab 219 ming avtomobilini qaytarib olmoqda
AQShda Tesla 219 mingga yaqin avtomobilini orqa ko‘rinish kamerasi nosozligi sabab qaytarib olmoqda. Bu safar gap mexanik nosozlik haqida emas. Teskari vitesga o‘tkazilganda kamera tasviri ekranda biroz kechikib chiqadi. Arzimasdek tuyilgan bu muammo aslida ancha jiddiy.
SPEEDME nashrining Milliy yo‘l harakati xavfsizligi boshqarmasi (NHTSA) ma’lumotlariga tayangan holda xabar berishicha, muammo 218 868 ta mashinaga, jumladan, Tesla’ning Model 3, Model Y, Model S va Model X rusumlariga taalluqli. Kechikish tufayli haydovchilar manyovrning birinchi muhim soniyalarida orqa tomonni yetarlicha aniq ko‘ra olmaydi. Hovlida to‘xtash, tor joydan chiqish yoki piyodalar yonida harakatlanishda bu jiddiy xavf tug‘diradi.
Xushxabar shuki, egalar servis markaziga borishi shart emas. Tesla nosozlikni bartaraf etuvchi dasturiy yangilanishni masofadan taqdim etdi. Aslida, bu Tesla uchun oddiy hol: brendning ko‘pgina qaytarib chaqiruvlari rasmiy hujjatlardagina aks etib, aslida yangi dasturiy ta’minot yuklab olinishi bilan bartaraf etiladi. Amalda bu shuni anglatadiki, foydalanuvchi hech qanday noqulaylik sezmaydi.
Bunday vaziyatlar tobora ko‘proq ekran va dasturiy ta’minotga bog‘liq bo‘layotgan zamonaviy avtomobillarning bir zaif jihatini ko‘rsatmoqda. Orqa ko‘rinish kamerasi avvaldan muhim xavfsizlik vositasi sanaladi. Biroq uning samarasi faqat linza sifatiga emas, balki ma’lumotlarga ishlov berish tezligiga va tasvirni chiqarish vaqtiga ham bog‘liq. Kechikish aynan orqaga harakatlanish chog‘ida yuz bersa, haydovchi vaziyatni to‘liq ko‘rmasdan turib mashinani yurgizib yuborishi ehtimoli bor.
Tesla avval ham tartibga soluvchi organlarning diqqat markaziga tushgan. O‘tgan oy NHTSA avtomobilni masofadan boshqarish funksiyasi yuzasidan 2,6 millionga yaqin Tesla bo‘yicha tergovni yakunlab, barcha nosozliklar faqat past tezlikda kuzatilganini xulosa qildi.