Rolls-Royce მთელი ოჯახისთვის: Maextro V800-ის სიგრძე თითქმის 5,5 მეტრია

© miit.gov.cn

ჩინური ბრენდი Maextro ემზადება მეორე მოდელის გამოშვებისთვის. თუ ბრენდის პირველი მანქანა იყო წარმომადგენლობითი სედანი S800, რომელიც მიზნად ისახავდა Bentley-ის, Mercedes-Maybach-ისა და Rolls-Royce-ის მყიდველებს, ახლა კომპანია ლუქს მინივენების სეგმენტში გადადის. სიახლის სახელია Maextro V800.

მოდელის პირველი სურათები და მონაცემები გამოჩნდა ჩინეთის მრეწველობისა და საინფორმაციო ტექნოლოგიების სამინისტროს ბაზაში. Maextro JAC Group-ისა და Huawei-ის ერთობლივი პროექტია, რომელიც HIMA ალიანსში შედის. ამავე სტრუქტურაში არიან Aito, Stelato, Luxeed და სხვა ბრენდები, რომლებიც საერთო აპარატურულ და პროგრამულ გადაწყვეტებს იყენებენ.

ზომების მხრივ V800 ნამდვილ გიგანტად აღმოჩნდა. მინივენის სიგრძეს 5,5-მეტრიან ნიშნულამდე სულ 5 მმ აკლია. ბორბლებს შორის მანძილი 3,43 მეტრია. ამდენად V800 უფრო გრძელიც კი არის ვიდრე სედანი S800, თუმცა სხვაობა მხოლოდ რამდენიმე სანტიმეტრით იზომება.

ჯერჯერობით გამოვლენილია მხოლოდ პლაგინ-ჰიბრიდული ვერსიის მახასიათებლები. მასში შედის 1,5-ლიტრიანი ბენზინის ძრავა 173 ცხ.ძ. სიმძლავრით. წყაროს აღწერით თუ ვიმსჯელებთ, იგი ძირითადად აკუმულატორის დასამუხტ გენერატორად მუშაობს — სხვა სიტყვებით, საქმე EREV-სქემაში გვაქვს. მანქანის მინიმალური მასაა 3120 კგ, სალონი კი შვიდ მგზავრზე გათვლილი.

ვარაუდობენ, რომ V800-ს შეიძლება ჰქონდეს 65 კვტ·სთ ტევადობის აკუმულატორი, ისეთივე, როგორიც Maextro S800-ის ჰიბრიდულ ვერსიებშია. S800 სედანში ამ პაკეტს უერთდება 1,5-ლიტრიანი 218 ცხ.ძ. ძრავა და ორი ან სამი ელექტროძრავა, ჯამური სიმძლავრე კი 530 ან 863 ცხ.ძ.-ს აღწევს. თუმცა V800-სთვის ეს მონაცემები ჯერ დადასტურებული არ არის.