ძრავა, რომელიც ნელ-ნელა თავის თავს ჭამდა და მაინც არ კვდებოდა

© A. Krivonosov

2009 წლის Toyota Camry დაშლის მაგიდაზე 305 000 მილის გარბენით აღმოჩნდა — ეს დაახლოებით 491 000 კმ-ია. ყველაზე უცნაური თავად გარბენი კი არ არის, არამედ ის, რომ ძრავა 2AZ-FE ამ ყველა წლის განმავლობაში დგუშის ბეჭდების ქარხნული დეფექტით მუშაობდა და ნელ-ნელა თავის თავს ანადგურებდა.

მექანიკოსმა The Car Care Nut-მა ძრავა ჩამოხსნა და დაშალა. დამნაშავე იყო დაბალი ხახუნის დგუშის ბეჭდები, რომლებსაც Toyota ასეთ ძრავებში 2000-იანების ბოლოს აყენებდა. დროთა განმავლობაში ისინი დაიკოქსა, ცილინდრების კედლები თითქმის სარკისებურად გაიპრიალა, ზეთის ხარჯი კი დაახლოებით ერთ ლიტრამდე 240 კმ-ზე ავიდა.

ბევრი ძრავისთვის ეს პირდაპირი გზაა გაჭედვისკენ. მაგრამ ამ Camry-ის შიგნით სხვა სურათი იყო: მუხლა ლილვი თითქმის უნაკაწრო, ბარბაცა ღერძის საკისრები მხოლოდ მსუბუქი ზედაპირული ცვეთით, განაწილების ლილვები და თავაკი კარგ მდგომარეობაში. მთავარი უბედურება დგუშის ჯგუფის გარშემო იყო თავმოყრილი და არა მთელ ძრავაში.

მფლობელი მანქანას შემთხვევით როდი ებღაუჭებოდა. 2009 წელს ის სპეციალურად ილინოისიდან ფლორიდამდე ჩავიდა, რათა აშშ-ში გაყიდული ერთ-ერთი ბოლო მექანიკურ-გადაცემიანი Camry ეყიდა. 491 000 კმ-ზე მფლობელობის ჯამურმა ხარჯმა 67 000 დოლარს მიაღწია, რომლის თითქმის ნახევარიც საწვავზე წავიდა. შეკეთება — Toyota-ს ახალი მოკლე ბლოკი, განახლებული დგუშები და სამუშაო — 5 000 დოლარზე ცოტათი მეტი დაჯდა.

მანქანის საშუალო ხარჯი გალონზე თითქმის 30 მილს უახლოვდებოდა, ანუ დაახლოებით 7,8 ლ/100 კმ. ახალი მანქანების ფასების ფონზე ეს Camry მფლობელისთვის ძველი ჯართი კი არ იყო, არამედ ნაცნობი მანქანა ცნობილი ისტორიითა და უკვე განკურნებული მთავარი სენით.